Bota nën “hijen” e Trump -Roli i SHBA-së në ekonominë globale të 2025
Fitorja e Donald Trump në zgjedhjet presidenciale në Shtetet e Bashkuara është një moment vendimtar për ekonominë globale dhe peizazhin gjeopolitik. Pavarësisht se është ende herët për të parashikuar impaktin e administratës së tij në tregjet dhe ekonomitë globale në 2025, disa tema kryesore kanë dalë në pah.
Si fillim, Trump e ka bërë të qartë se “tarifa” është fjala e tij e preferuar. Ai synon të rrisë tarifat për mallrat e importuara, me Kinën që ka të ngjarë të përballet me peshën kryesore. Gjithashtu, ai planifikon të reduktojë taksat dhe rregulloret në SHBA, megjithëse nuk është ende e qartë se sa të thella do të jenë shkurtimet dhe si do të realizohen ato. Ndërsa në frontin gjeopolitik, emërimet e tij të hershme në administratë tregojnë se ai ka të ngjarë të ndjekë një politikë të jashtme transaksionale, të prirur ndaj izolimit "Amerika vjen e para", një strategji e ngjashme me mandatin e tij të parë.
Reagimi fillestar i tregut ndaj fitores së tij ka qenë relativisht i rregullt, me performancën më të mirë të aseteve të rrezikut të SHBA dhe dollarit amerikan, dhe yield-et e obligacioneve qeveritare që u stabilizuan pas një rritjeje të madhe parazgjedhore. Në perspektivë, një rrezik kryesor është një mbështetje e mundshme në yield-et e obligacioneve të qeverisë amerikane (me efekte të valëzuara nëpër tregjet globale), nëse administrata e re e Trump përpiqet të shtyjë shkurtimet e taksave pa një plan të besueshëm për t’i paguar për to.
Një tjetër rrezik kyç është një luftë e përshkallëzuar tregtare globale që prish zinxhirët e furnizimit dhe e redukton rritjen globale, duke çuar lart edhe inflacionin. Parashikimet racionale trergojnë se skenarët e rasteve më të këqija do të shmangen, duke lejuar që zgjerimi aktual ekonomik global të zgjasë deri në vitin 2025. Megjithatë, Trump është i paparashikueshëm dhe pa kufizimet e qeverisë së ndarë, politikat e tij dhe perspektiva globale kanë potencialin për të ndryshuar shpejt.
Ø Politikat tregtare
Një mesazh kyç i fushatës së Trump ishte se administrata e tij planifikon të rrisë tarifat për mallrat e importuara. Megjithëse janë dhënë shumë pak specifika, gjatë fushatës së tij, kreu i republikanëve tregoi se donte të vendoste tarifa të përgjithshme deri në 60% për importet e mallrave nga Kina dhe 10% ose 20% tarifa për importet e mallrave nga të gjitha vendet e tjera. Kohët e fundit ai njoftoi se do të vendoste një tarifë 25% për importet e mallrave nga Meksika dhe Kanadaja. Mbetet për t'u parë se si këto politika do të zbatohen në praktikë. Herën e fundit tarifat u zbatuan mbi bazën e nënprodukteve më pak të dëmshme, për të zvogëluar ndikimin tek konsumatorët amerikanë.
Ç’nënkuptojnë tarifat më të larta për ekonominë amerikane?
Pjesa më e madhe e analistëve tregojnë se një rritje e madhe e tarifave të SHBA-së do të ketë një ndikim frenues në kërkesën e brendshme të SHBA-së, ndërsa fuqia reale blerëse do dëmtohet nga çmimet më të larta të mallrave. Gjithashtu, investimet do të goditen nga pasiguria më e lartë tregtare, me disa kompensime nga të ardhurat e tarifave të qeverisë, në varësi të shkallës që ato përfshihen në ekonomi nëpërmjet uljes së taksave dhe shpenzimeve më të larta. Sipas ekspertëve, tarifat më të larta të importit do të jenë fillimisht inflacioniste pasi kostot e tarifave kalojnë te konsumatori. Megjithatë, në fund, rritja më e ngadaltë e kërkesës pasi të goditen të ardhurat reale dhe efektet bazë pas rritjes së çmimit fillestar, do të sjellin uljen e inflacionit.
Ndikimi i tarifave në Evropë
Për sa i përket ndikimit potencial të drejtpërdrejtë të rritjes në Evropë, eksportet e mallrave të Evropës në SHBA në 2023 ishin ekuivalente me rreth 3.2% të Prodhimit të Brendshëm Bruto. Edhe për Gjermaninë, ekonominë më të ekspozuar të Evropës, eksportet e mallrave në SHBA ishin të barasvlershme me 4.2% të PBB-së. Eksportet e mallrave të Mbretërisë së Bashkuar në SHBA janë ekuivalente me 2.2% të PBB-së.
Sektori i prodhimit përbën rreth 15% dhe sektori i shërbimeve përbën mbi 80% të PBB-së së Evropës. Edhe pse kompanitë e shërbimeve që mbështesin eksportuesit e mallrave vendase në SHBA mund të preken, pjesa më e kompanive të sektorit të shërbimeve do të kenë pak ndikim të drejtpërdrejtë nga tarifat më të larta të mallrave amerikane.
Nëse Trump zbaton kërcënimin e tij, taksat e importit për mallrat do të kenë pasoja potencialisht të mëdha për pjesë të sektorit të prodhimit të Evropës, si veturat, sektorin farmaceutik dhe makineritë në veçanti, por ndikimi në ekonomitë e përgjithshme të Evropës dhe Mbretërisë së Bashkuar pritet të jetë i menaxhueshëm, sipas analistëve. Impakti në inflacion pritet të jetë i papërfillshëm, duke pasur parasysh presionet tashmë të dobëta themelore të inflacionit dhe reagimin e mundshëm të tarifave të vogla “hakmarrëse”.
Ekonomia e Kinës, objektivi kryesor i Trump
Ndikimi i mundshëm në Kinë do të jetë shumë më i madh, duke pasur parasysh nivelet më të larta të tarifave të propozuara për Kinën dhe ekspozimin ndjeshëm më të madh të vendit ndaj sektorit të prodhimit, që përbën rreth 26% të PBB-së. Nëse Trump rrit tarifat në 60%, kjo mund të reduktojë eksportet e Pekinit me rreth 200 miliardë dollarë, duke ulur PBB-në me 1%, shpjegojnë ekspertët.
Ndërsa rritja ngadalësohet, mbështetja e mëtejshme fiskale, lehtësimi monetar dhe zhvlerësimi i juanit duken të mundshme. Qeveria kineze ka shprehur ambiciet e saj për të mbështetur rritjen ekonomike në nivelin 5% dhe për të adresuar problemet e tregut të pronave në mbështetje të konsumatorëve vendas.
Tarifat e larta amerikane për mallrat kineze mund të dëmtojnë gjithashtu Evropën. Nëse Kina nuk mund të eksportojë më në Amerikë, do të zhvendosë vëmendjen drejt Evropës, duke rrezikuar të “përmbysë” tregun.
Pasojat e politikave fiskale për SHBA-në
Studiuesit shpjegojnë se nëse të gjitha planet e taksave dhe shpenzimeve të Trump do të zbatoheshin, kjo do ta shtynte borxhin kombëtar të SHBA-së me rreth 8 trilionë dollarë gjatë dhjetë viteve të ardhshme, një rritje prej 45% e PBB-së. Që tani, pagesat e interesit për borxhin e qeverisë amerikane janë më të mëdha se shpenzimet për mbrojtjen.
Edhe pse nuk ka gjasa që të gjitha propozimet e Trump të zbatohen, nëse edhe një pjesë e reduktimeve të taksave miratohen pa shkurtime të besueshme të shpenzimeve diku tjetër, ekziston rreziku që investitorët ta shohin trajektoren e borxhit të SHBA-së si të paqëndrueshme dhe të kërkojnë norma më të larta interesi për borxhin e qeverisë.
Gjithashtu, efekti stimulues i një zgjerimi të madh të mëtejshëm fiskal në një ekonomi që tashmë po rritet në apo mbi potencialin, ka mundësi të ushtrojë presion rritës mbi inflacionin, përveç ndikimit fillestar inflacionist të tarifave.
Një rrezik shtesë për perspektivën është mundësia e rritjes së yield-eve të obligacioneve të qeverisë amerikane nëse administrata e re e Trumpit çon përpara uljen e taksave pa një plan të besueshëm për t'i financuar ato.
Ø Sektori energjetik
Burimet e rinovueshme kanë qenë në fokus të sektorit energjetik në SHBA gjatë katër viteve të fundit. Pas Aktit të Reduktimit të Inflacionit (IRA) të miratuar në vitin 2022, investimet u derdhën në teknologjitë e erës dhe diellit mes premtimeve federale për të ndihmuar në përballimin e faturave.
Ky proces mund të marrë një kthesë të papritur. Trump ka përbuzur koston dhe efikasitetin e shpenzimeve të teknologjisë së gjelbër, duke e quajtur atë "mashtrimin më të madh në historinë e çdo vendi". Administrata e tij e mëparshme ishte pa dyshim më tolerante ndaj karburanteve fosile sesa ajo e Joe Biden. Pritshmëritë tregojnë se Trump do të dyfishojë politikat që promovojnë naftën, gazin natyror dhe qymyrin, duke anashkaluar potencialisht nismat e energjisë së rinovueshme.
Propozimet e politikave të tij tregojnë për një ringjallje të burimeve tradicionale të energjisë. Presidenti i rizgjedhur i ka cilësuar lëndët djegëse fosile si thelbësore për forcimin e sigurisë së energjisë dhe, gjatë mandatit të tij të mëparshëm, realizoi hapa konkretë në këtë drejtim. Shtetet e Bashkuara u bënë prodhuesi kryesor i naftës në botë në vitin 2018, një moment historik që ai e përmend si dëshmi të suksesit të strategjive energjetike. Administrata e Informacionit të Energjisë (EIA) raportoi se SHBA prodhonte mbi 12 milionë fuçi naftë bruto në ditë deri në vitin 2019, një maksimum historik.
Gjatë fushatës, Trump u zotua të përshpejtojë lejet federale të shpimit, të reduktojë barrierat rregullatore dhe të zgjerojë eksplorimin në tokat publike. Administrata e tij planifikon gjithashtu të thjeshtojë miratimet për tubacionet e gazit natyror. Ndërkohë, me tranzicionin e gjelbër të Amerikës, të përforcuar nga rregulloret dhe subvencionet e favorshme, është e paqartë se çfarë do të sjellë e ardhmja nëse këto eleminohen. Një rikalibrim i sektorit energjetik të SHBA-së po vjen, me implikime që do të valëzojnë tregjet e brendshme dhe globale të energjisë.
Energjia e rinovueshme, një perspektivë e luhatshme
Industria diellore dhe e erës në SHBA kanë parë një zgjerim të jashtëzakonshëm gjatë dekadës së fundit. Kapaciteti i energjisë diellore u rrit nga 40 GW në 2016 në mbi 140 GW deri në vitin 2023, mbështetur nga rënia e kostove dhe kërkesa në rritje e konsumatorëve.
Por rritja e ardhshme është në dyshim. Ligji për Reduktimin e Inflacionit përfshin kredi tatimore me vlerë midis 500 miliardë dhe 1 trilion dollarësh për projektet e energjisë së pastër. Trump e ka kritikuar këtë ligj si shpërdorues dhe joefikas. Edhe pse shfuqizimi i plotë nuk ka gjasa të ndodhë për shkak të mbështetjes së republikanëve për disa dispozita në shtetet e dominuara prej tyre, qasja e Trump mund të sjellë vonesa dhe pasiguri, duke frenuar investimet në burimet e rinovueshme. Dhe me mbi 90% të fondeve të lidhura me këtë ligj ende të pashpërndara, ato janë të cenueshme ndaj ridrejtimit në sektorë të tjerë.
Për më tepër, Trump ka premtuar një reduktim të rregulloreve mjedisore, për të cilat ai argumenton se kanë mbytur rritjen ekonomike. Kjo përfshin dobësimin e Agjencisë për Mbrojtjen e Mjedisit dhe rishikimin e objektivave të karbonit. Këto vendime mund të ulin kostot për bizneset dhe potencialisht të reduktojnë çmimet e energjisë, por gjithashtu rrezikojnë rritjen e emetimeve të karbonit dhe të vonojnë reduktimin e varësisë nga karburantet fosile.
Peizazhi i energjisë së rinovueshme nuk është i njëtrajtshëm. Dinamika e tregut dhe iniciativat në nivel shtetëror vazhdojnë të nxisin pjesën më të madhe të rritjes së sektorit. Vetëm Teksasi përbën rreth 50 projekte të mëdha të energjisë së rinovueshme aktualisht në zhvillim. Këto përpjekje lokale, së bashku me angazhimet e qëndrueshmërisë së korporatave, mund të zvogëlojnë njëfarë ndikimi nga ndryshimet e politikave federale. “Trajektorja e tranzicionit energjetik të SHBA-së tani ndikohet nga një grup më i gjerë aktorësh, duke përfshirë investitorët e sektorit privat, qeveritë shtetërore dhe forcat e tregut ndërkombëtar”, thonë analistët e GlobalData. "Këto entitete pritet t'i japin përparësi qëndrueshmërisë dhe energjisë së pastër, pavarësisht nga ndryshimet e politikave federale."
Makinat elektrike
Për sa u përket automjeteve elektrike, Trump ka kritikuar vazhdimisht stimujt që jepen për to, duke përfshirë kreditë tatimore me vlerë deri në 7,500 dollarë për makinë. Planet për të vendosur tarifa 60% për importet kineze, duke përfshirë bateritë e këtyrë automjeteve, mund të rrisin kostot e prodhimit dhe të ngadalësojnë procesin.
Nga ana tjetër, prodhimi vendas i komponentëve të makinave elektrike mund të marrë një nxitje nën agjendën e Trump. Një zinxhir furnizimi i lokalizuar mund të zvogëlojë varësinë nga importet, duke ofruar elasticitet afatgjatë për sektorin. Dhe me CEO-n e Tesla-s, Elon Musk, që do të bëhet anëtar i kabinetit, ky sektor do të ketë një zëdhënës në zemër të qeverisë.
Rruga drejt tranzicionit
Pavarësisht pengesave të mundshme të paraqitura nga një presidencë e Trump, është e vështirë të imagjinohet se tranzicioni energjetik i SHBA-së do të ndalet. Forcat e tregut vazhdojnë të favorizojnë burimet e rinovueshme, të nxitura nga rënia e kostove, përparimet teknologjike dhe rritja e kërkesës për energji të pastër.
Gjatë mandatit të parë të Trump, industritë diellore dhe të erës vazhduan të rriteshin shëndetshëm, edhe pse politikat federale u jepnin përparësi karburanteve fosile. Investimet e sektorit privat, së bashku me iniciativat e nivelit shtetëror, sugjerojnë se sektori i energjisë së rinovueshme mund të përballojë një kthesë të përkohshme federale drejt karburanteve fosile. Për më tepër, konsideratat gjeopolitike, si shqetësimet e sigurisë së energjisë që rrjedhin nga mbështetja në teknologjitë e importuara, mund të nxisin inovacionin dhe investimet në prodhimin e energjisë së pastër me bazë në SHBA.
Kthimi i Donald Trump në presidencë do të ndryshojë pa dyshim trajektoren e politikës energjetike të SHBA. Por ende nuk është e qartë se cili do të jetë ekuilibri i Amerikës midis lëndëve djegëse fosile dhe burimeve të rinovueshme deri në fund të mandatit të tij. Pavarësisht mospërfilljes së mbështetësve të tij dhe frikës së kundërshtarëve, tranzicioni i energjisë duket mjaft i fortë për të përballuar ndryshimet politike. Analistët do të vëzhgojnë me vëmendje ritmin e progresit për të përcaktuar nëse politikat e Trump do të jenë në përputhje me retorikën e tij të guximshme dhe cilat do të jenë pasojat afatgjata për tranzicionin e gjelbër.
Ø Inteligjenca artificiale nën drejtimin e Trump
Zgjedhja e Donald Trump për një mandat të dytë vjen në një moment kyç për inteligjencën artificiale, që vazhdon të përparojë me shpejtësi, dhe politikat e administratës së ardhshme do të ndikojnë në zgjerimin e saj. Presidenti Trump do të përballet me një panoramë të ndryshme nga ajo me të cilën u përball kur ishte më parë në detyrë. Ai gjithashtu do të sjellë një vizion tjetër në raport me paraardhësin e tij, Joe Biden, i cili kryesisht u përqendrua në krijimin e barrierave për zhvillimin e sigurt të teknologjisë dhe zbutjen e rreziqeve të saj. Trump pritet të kthejë mbrapsht iniciativat që mund të pengojnë inovacionin, të promovojë dominimin amerikan në garën kundër Kinës në këtë sektor dhe të shfrytëzojë teknologjinë për të forcuar sigurinë kombëtare të SHBA-së.
Shfuqizimi i ligjit të Biden
Arritja kryesore e Presidentit Biden ishte Urdhri i tij Ekzekutiv për inteligjencën artificiale, që fokusohet në balancimin e inovacionit dhe zbutjen e rrezikut. Trump, megjithatë, pritet të përmbushë premtimin e tij të fushatës për të shfuqizuar pjesën më të madhe, nëse jo të gjithë ligjin e Biden, të cilin ai e kritikoi si "të rrezikshëm" dhe një pengesë për inovacionin, veçanërisht sepse theksonte antidiskriminimin, mbrojtjen e paragjykimeve dhe etikën. Platforma e Trump mbështet zhvillimin e teknologjisë bazuar në fjalën e lirë dhe zhvillimin njerëzor.
Pavarësisht kësaj, Trump mund të mbajë ose zgjerojë pjesë të ligjit që lidhen me sigurinë kombëtare, duke përfshirë sigurinë kibernetike, qendrat e të dhënave dhe zhvillimin e inteligjencës artificiale për të forcuar mbrojtjen.
Për më tepër, ai mund të krijojë një Urdhër të ri Ekzekutiv, duke i dhënë përparësi teknologjisë ushtarake dhe duke reduktuar rregulloret që pengojnë inovacionin. Gjithashtu, synohet krijimi i agjencive të udhëhequra nga industria për të vlerësuar modelet e inteligjencës artificiale dhe për të mbrojtur sistemet nga kërcënimet e huaja.
Gara kundër Kinës
Agjenda e Trump përqendrohet në dominimin e Shteteve të Bashkuara në sektorin e inteligjencës artificiale, veçanërisht në konkurrencë me Kinën. Ai ka theksuar nevojën e SHBA-së për të siguruar pavarësinë strategjike nga Pekini. Qasja e Trump pritet të përfshijë mbrojtjen e përparimeve në këtë sektor nga kundërshtarët e huaj, veçanërisht nga superfuqia aziatike, të cilën e ka akuzuar për vjedhje të sekreteve industriale. Duke u mbështetur në përpjekjet e Biden, Trump mund të zgjerojë kontrollet e eksportit, të përdorë tarifat dhe të vendosë masa të tjera për të kufizuar aksesin e Kinës në zhvillimet e teknologjisë amerikane.
Ndërkaq, ai pritet të kundërshtojë përpjekjet e rregulloreve që kufizojnë teknologjinë në vend. Në vitin 2019, Trump nënshkroi një Urdhër Ekzekutiv për të mbajtur lidershipin e SHBA-së në sektorin e inteligjencës artificiale, i cili mbështeste "kërkimin dhe inovacionin amerikan, duke hapur tregje për industritë vendase". Strategjia Kombëtare e Trump në 2020 për Teknologjitë Kritike dhe në Zhvillim thekson gjithashtu se “një treg i hapur i për inovacionin do ta vendosë Amerikën përpara vendeve si Kina në këtë drejtim”.
Raportet SHBA-BE në teknologji
Bashkimi Evropian dhe Shtetet e Bashkuara kanë qenë prej kohësh partnerë në sektorin e teknologjisë, por tensionet po rriten për shkak të rregulloreve si Akti i Shërbimeve Digjitale i BE-së. Ky akt, që mbron të drejtat e konsumatorëve dhe frenon rreziqet si dezinformimi, synon platformat kryesore të teknologjisë, shumë prej të cilave janë me bazë në SHBA. Kjo ka çuar në kritika nga ligjvënësit amerikanë, të cilët argumentojnë se akti godet padrejtësisht kompanitë amerikane.
Me kthimin e Trump në detyrë, këto tensione mund të përshkallëzohen, veçanërisht duke pasur parasysh lidhjet e tij me liderët e teknologjisë si Elon Musk, kompania X e të cilit është nën hetim për shkelje të rregullores.
Lidhjet e ngushta të Musk me Trump ngrenë shqetësime se administrata e re mund të ndikojë në qasjen e BE-së ndaj rregullores së teknologjisë, duke zbutur potencialisht zbatimin e Aktit të Shërbimeve Digjitale.
Ndërsa blloku mbetet i angazhuar në këtë drejtim, aftësia e tij për të vepruar lirisht mund të rrezikohet nga presionet e mundshme nga administrata e Trump, e cila historikisht ka qenë kritike ndaj rregulloreve të BE-së. Nëse SHBA avancon me masa tregtare ose me ndikim politik, mund të krijojë një situatë të vështirë për bllokun, duke e detyruar atë të zgjedhë midis mbështetjes së qëllimeve rregullatore apo përshtatjes me interesat e SHBA-së.
Ø Kriptomonedhat
Përkrahësit e kriptomonedhave festuan fitoren e presidentit të sapozgjedhur Donald Trump në mandatin e dytë. Bitcoin arriti mbi 100,000 dollarë gjatë dhjetorit, një rritje e nxitur nga optimizmi se administrata Trump do të ishte më miqësore me industrinë e kriptomonedhave.
Trump emëroi favorizuesin e kriptove, Paul Atkins, si të zgjedhurin e tij për kryetar të Komisionit të Letrave me Vlerë dhe Shkëmbim dhe njoftoi se po emëronte ish-ekzekutivin e PayPal, David Sacks në krye të inteligjencës artificiale dhe kriptove, duke dhënë më shumë shenja se ai synon të ndryshojë politikën amerikane dhe t’u japë një shtysë monedhave digjitale.
Dikur skeptik, Trump premtoi në qershor se do t'i bënte Shtetet e Bashkuara "kryeqytetin e kriptove në planet” dhe bëri thirrje për krijimin e një "rezerve strategjike" të bitcoin të SHBA. Ai theksoi gjithashtu se rregulloret do të shkruheshin nga "njerëzit që e duan" industrinë.
Mungesa e një rregulloreje
Kriptomonedha është një formë e monedhës digjitale, e krijuar për t'u përdorur në internet, përmes një rrjeti të decentralizuar dhe e pambështetur nga asnjë qeveri apo bankë. Bitcoin, kriptomonedha më e njohur, u krijua në vitin 2009. Ndërsa ajo ka fituar më shumë popullaritet në dekadën e fundit, ende nuk shihet si një investim i sigurt nga shumica e amerikanëve.
Fillimisht, përkrahësit e lartësuan kriptomonedhën për ofrimin e privatësisë dhe një monedhë alternative jashtë autoritetit të qeverive kombëtare ose sistemit financiar ndërkombëtar. Përdoruesit mund të kryejnë transaksione që, në teori, nuk mund të gjurmohen nga autoritetet ose një institucion financiar. Kriptomonedha tërhoqi interesat e ndërmarrjeve kriminale për të njëjtën arsye.
Pjesa më e madhe e njerëzve nuk po e përdorin atë si monedhë për të blerë mallra dhe shërbime, por kryesisht si një investim, megjithëse disa kritikë paralajmërojnë se natyra e paqëndrueshme e industrisë e bën atë të ngjashme me lojërat e fatit.
Sipas ekspertëve, industria ka nevojë për një rregullore, sepse shumë njerëz dhe institucione janë tepër të kujdesshëm në lidhje me çdo marrëveshje me kriptovalutat. Monedhat kripto mund të jenë të paqëndrueshme, që do të thotë se ato mund të sjellin fitime të shpejta, por mund të humbasin vlerën e tyre po aq shpejt. Ato gjithashtu kanë qenë subjekt i mashtrimit dhe, veçanërisht në ditët e para të kriptomonedhave, ishin të lidhura me aktivitete të paligjshme, duke përfshirë krimin e organizuar.
“Çdo industri, duke përfshirë industrinë e kriptomonedhave, do të donte të kishte atë legjitimitet që vjen nga rregullorja e qeverisë,” shprehen analistët, duke shtuar se këto rregulla “nuk do të pengonin realizimin e fitimeve”.
Krijimi i një “rezerve strategjike” kripto
Disa mbështetës të kriptomonedhave kanë propozuar që SHBA të vendosë fonde për të krijuar një rezervë strategjike të kriptomonedhave, si bitcoin, një mundësi që Trump e ka miratuar.
Një rezervë strategjike e bitcoin do të ishte një fond në rast emergjencash ose trazirash dhe mund të veprojë në mënyrë të ngjashme me rezervën strategjike të naftës të SHBA-së, e cila blen naftë bruto kur çmimi bie, duke e ruajtur atë për ta shitur në të ardhmen kur çmimet të jenë rritur. Kritikët e idesë e shohin analogjinë me naftën si të gabuar, pasi kriptovalutat nuk kanë të njëjtën vlerë strategjike si karburanti për transport apo për prodhimin e energjisë.
Në konferencën e kriptomonedhës në Nashville, Trump propozoi që qeveria e SHBA të ndalojë shitjen e bitcoin të sekuestruar nga zbatimi i ligjit dhe në vend të kësaj ta mbajë atë në një rezervë strategjike.
Një rezervë strategjike mund të zbusë luhatjet e vlerës, sipas ekspertëve. “Një organizatë aq e madhe sa qeveria federale e SHBA-së që zotëron një sasi të konsiderueshme të një aseti ka të ngjarë ta stabilizojë atë,” shpjegojnë ata.
Gjithashtu, një rezervë strategjike e bitcoin-it do të sillte përfitime edhe për industrinë e kriptomonedhave, duke e bërë më “tërheqëse” për publikun dhe duke rritur kërkesën.
Bitcoin në 2025
Sipas një raporti të fundit nga Bitfinex, Bitcoin ka mundësinë të përjetojë rënie gjatë fillimit të vitit 2025, por këto do të jenë të shkurtra dhe të përkohshme, që nuk do të pengojnë rrjedhën e rritjes.
Kjo do të ndodhë kryesisht për shkak të kërkesës së lartë nga institucionet financiare. Në raport theksohet se "çdo korrigjim i mundshëm në vitin 2025 do të jetë i butë, falë investimeve të vazhdueshme nga institucionet".
Në skenarin më optimist, ekspertët parashikojnë se çmimi i Bitcoin mund të dyfishohet deri në qershor 2025, duke arritur mesatarisht nga 145,000 dollarë deri në 200,000 dollarë, në kushte të favorshme. Kjo do të kërkonte një rritje prej mbi 92% mbi vlerën aktuale të kriptomonedhës.
Sondazh
Rusia kërkon ndihmën e Kinës në IA - Putin bën thirrje për më shumë bashkëpunim në sektorin e teknologjisë
Rusia ka bërë thirrje për të shtuar bashkëpunimin me Kinën në fushën e inteligjencës artificiale për të konkurruar me Shtetet e Bashkuara. Të dyja vendet po......
Hungaria humb fondet e BE-së/1 miliard euro janë bllokuar për shkelje të rregullave të bllokut
Hungaria ka humbur zyrtarisht fondet e Bashkimit Evropian me vlerë 1 miliard euro, për shkak të dyshimeve për korrupsion. Ky vendim, që është konfirmuar......
2600 biznese, në treg të lirë energjie-Apeli i Entit Rregullator: Gjeni dhe kontraktoni furnizuesin tuaj
Enti Rregullator i Energjisë ka apeluar bizneset që kanë plotësuar kriteret për të dalë në tregun e liberalizuar të energjisë, të gjejnë dhe kontraktojnë......
Ndërpriten eksportet e gazit rus në Evropë - Ukraina ndal tranzitin, pritet rritje cmimi per konsumatoret
Me hyrjen e vitit të ri, eksportet e gazit rus përmes Ukrainës u ndalën, duke shënuar fundin e dekadave të dominimit të Moskës në tregjet energjetike të......
Mbi 742 mijë depozitime në ATM për 9-mujorin/ Turizmi ndikoi rritjen e numrit dhe vlerës së transaksioneve
Në dy vitet e fundit, pagesat dhe depozitimet përmes ATM-ve kanë përjetuar një rritje të ndjeshme, e nxitur kryesisht nga performanca e pozitive e turizmit,......
Ekonomia 2025, pritshmëritë e rritjes në një vit zgjedhor - Nëndeklarimi i pagave dhe informaliteti, sfidat që duhen përballuar
Bilanci i zhvillimit të ekonomisë së Shqipërisë për vitin 2024, pas arritjeve dhe rezultateve të pamohueshme zbulon edhe shumë problemeatika strukturore dhe......
Bizneset po “distancohen” nga kreditimi? 70 % e kredisë së re u shpërnda për Tregtinë, Ndërtimin dhe Industrinë
Në muajin nëntor të këtij viti huatë e reja të dhëna për bizneset dhe korporatat jofinanciare private të cilësuara sipas aktivitetit të tyre ekonomik......
Plazh në janar! - Kryeministri Rama ndan pamjet e qytetarëve që lahen në detin e Vlorës
Temperaturat e ulëta që kanë pushtuar vendin nuk kanë ndaluar disa qytetarë të kalojnë ditët e para të vitit në plazh, duke sfiduar edhe të ftohtin me larjen......
