Shqipëria Postuar më 12 Gusht 2022, 12:14

Bregdeti, me ujë 24 orë në 2025-ën! - Qeveria zgjat me 2 vjet planet për furnizim të pandërperë. Objektivi synohej të arrihej në 2023-in

Nga SCAN TV
Bregdeti, me ujë 24 orë në 2025-ën! - Qeveria zgjat me 2

Teksa kthimi i Shqipërisë në një destinacion tërheqës turistik, cilësor dhe të qëndrueshëm është një nga qëllimet kryesore të qeverisë, furnizimi me ujë dhe shërbime i zonës bregdetare 24 orë do të mund të arrihet në vitin 2025.

Gjithçka përcaktohet në programit buxhetor afatmesëm 2023 – 2025, duke zgjatur edhe me 2 vjet objektivin e përcaktuar në programin 2022 – 2024, ku synohej që furnizimi me ujë pa ndërprerje në bregdet të arrihej në vitin 2023.

Ndërkaq, programi i ri specifikon se mesatarja e orëve të furnizimit me ujë të pijshëm në rang kombëtar parashikohet të rritet në 14 orë në ditë në 2024, nga 12.5 orë në ditë që është aktualisht.

Sipas dokumentit të publikuar në Fletoren Zyrtare, mbulimi me shërbim furnizimi me ujë të pijshëm në zonat urbane parashikohet të rritet me 1%, duke arritur në  95% në vitin 2025, ndërsa për zonat rurale parashikohet të arrijë në 62% në vitin 2025 nga 59% që është aktualisht.

Në fakt, zgjerimi i aksesit dhe cilësisë së shërbimit të ujit të pijshëm dhe kanalizimeve përmes një portofoli të investimeve publike dhe përmirësimit rrënjësortë menaxhimit të shoqërive aksionere të ujësjellës kanalizimeve është renditur si një prej prioriteteve kryesore të Ministrisë së Infrastrukturës dhe Energjisë.

Ndërkohë që, shpenzimet buxhetore për furnizimit me ujë dhe kanalizime parashikohet të rriten përgjatë periudhës afatmesme.

Për vitin 2022, buxheti i akorduar për këtë program është 14.2 mld lekë, ndërkohë që sipas programit buxhetor afatmesëm për vitin 2023 parashikohet një rritje në 15 mld lekë. Për vitin 2024 shpenzimet buxhetore për furnizimin me ujë dhe kanalizime parashikohet të jenë 17.2 mld lekë, ndërkohë që 2025-ën parashikohet një rritje në 20 mld lekë.

Ola Mitre / SCAN

https://www.youtube.com/watch?v=FLkzOrE3boI

Sondazh

Poll

Live TV

Të fundit
Të gjitha lajmet

Më të vizituarat