Karriera Kontakt
English
Live TV

Tregjet

S&P 500
5282,7
0,13%
Nasdaq
16286,45
0,13%
10-Yr Bond
4,33
1,25%
FTSE 100
8275,66
0%
Crude Oil
64,45
0,36%
Gold
3341,3
0,39%
EUR/USD
1,14
0%
Shqipëria Postuar më 25 Shtator 2024, 15:14

10 vite procesi i Berlinit: Një dekadë bashkëpunimi për Ballkanin perëndimor!

Nga SCAN TV
10 vite procesi i Berlinit: Një dekadë bashkëpunimi për

 

Në konferencën e mbajtur sot, me temë "Ballkani Perëndimor, si një rajon ekonomik në rrugën drejt Bashkimit Evropian", ku morën pjesë ministrat e ekonomisë të vendeve të WB6, të ftuar nga Ministria Federale Gjermane për Ekonominë, Tregtinë dhe Klimën. Ndër të pranishmit ishin gjithashtu ministra të ekonomisë të disa vendeve të BE-së, përfaqësues të Komisionit Evropian (DG NEAR), OECD, Dhoma Gjermane e Industrisë dhe Tregtisë, Dhoma e Investimeve të WB6 (CIF), Dhomës Shqiptare e Tregtisë dhe Industrisë, si dhe përfaqësues të shumtë të sektorit privat.

Pjesëmarrësit shqyrtuan një sërë çështjesh thelbësore që kanë shoqëruar Procesin e Berlinit gjatë këtyre 10 viteve:

  • Vlerësimi i progresit të deritanishëm të Procesit të Berlinit;

  • Hapat e ndërmarrë nga vendet e rajonit drejt krijimit të një tregu të përbashkët;

  • Sfidat dhe pengesat që mbeten për integrimin në tregun evropian;

  • Tërheqja e investimeve të huaja në Ballkanin Perëndimor;

  • Perspektivat e zhvillimit rajonal dhe fushat me potencial për rritje ekonomike;

  • Ndërtimi i një ekonomie të qëndrueshme, me fokus në inovacionin dhe dixhitalizimin.

Gjatë fjalës së tij, Ministri Gonxhja nënvizoi arritjet e Shqipërisë në kuadër të Marrëveshjes CEFTA dhe Planit të Veprimit të Tregut të Përbashkët Rajonal. Vendi ka bërë përparime të rëndësishme në lehtësimin e tregtisë së mallrave dhe shërbimeve, si dhe në lëvizjen e lirë të punonjësve, çka ka sjellë një rritje të dukshme të volumit tregtar dhe ka forcuar bashkëpunimin institucional rajonal.

Në fjalën e tij, Ministri Gonxhja evidentoi ecurinë e mirë të Shqipërisë në këtë rrugëtim, duke identifikuar gjithashtu tri sfida kryesore të përbashkëta për vendet e Ballkanit Perëndimor, që kërkojnë mbështetjen e vazhdueshme të BE-së:

  • Zhvillimi i infrastrukturës moderne;

  • Harmonizimi i legjislacionit me standardet e BE-së;

  • Integrimi ekonomik dhe tregtar për ndërtimin e një ekonomie të qëndrueshme dhe konkurruese.

Pas konferencës u mbajt një seancë plenare me ministrat përgjegjës për ekonominë e vendeve të WB6, nën drejtimin e Ministrisë Federale Gjermane për Ekonominë, Tregtinë dhe Klimën. Kjo seancë u përqendrua në Planin e Veprimit të Përbashkët dhe tërheqjen e investimeve, si një motor kyç për zhvillimin rajonal.

Ministri Gonxhja vuri në dukje sfida të rëndësishme, si heqja e barrierave teknike, fiskale dhe fizike, optimizimi i sistemit doganor dhe harmonizimi legjislativ, që janë prioritet për të përmirësuar tregtinë në rajon dhe me BE-në. Përmirësimi i infrastrukturës dhe dixhitalizimit janë gjithashtu thelbësore për ndërtimin e një ekonomie konkurruese.

Lidhur me investimet, momenti aktual shihet si një mundësi unike për vendet e Ballkanit Perëndimor. Duke përafruar politikat dhe standardet me ato të BE-së dhe praktikat më të mira ndërkombëtare, vendet e rajonit mund të hapin dyert për investime kapitale dhe të krijojnë një treg më të madh e më të favorshëm për investitorët, si vendas ashtu edhe të huaj.

Në përfundim të takimeve, u theksua se udhëtimi drejt integrimit evropian është një sfidë komplekse që kërkon mbështetje politike, përkushtim të vazhdueshëm dhe angazhim të të gjithë aktorëve — nga qeveritë, te bizneset dhe shoqëria civile. Suksesi i këtij udhëtimi varet nga bashkëpunimi rajonal dhe vizioni i përbashkët për një prosperitet të përbashkët.

Procesi i Berlinit, pavarësisht vështirësive, synon të sjellë përfitime të qëndrueshme për vendet e Ballkanit Perëndimor, duke i afruar gjithnjë e më shumë me Bashkimin Evropian.

Sondazh

Poll

Live TV

Të fundit
Të gjitha lajmet

Më të vizituarat

Video