Malaj në SHBA: Ekonomia shqiptare e qëndrueshme, menaxhimi i kujdesshëm fiskal ka forcuar financat publike
Ministri i Financave, Petrit Malaj, mori pjesë në Takimet e Pranverës të Fondit Monetar Ndërkombëtar dhe Grupit të Bankës Botërore, të cilat u zhvilluan në datat 13-18 Prill 2026, në Uashington të Shteteve të Bashkuara të Amerikës. Shqipëria u përfaqësua në këto takime nga një delegacion i nivelit të lartë, ku merrnin pjesë dhe Guvernatori i Bankës së Shqipërisë, Gent Sejko, Zëvendësministri i Financave, Endrit Yzeiraj, si dhe drejtues të tjerë të lartë të Ministrisë së Financave dhe Bankës së Shqipërisë. Qëllimi i këtyre takimeve ishte diskutimi në nivel ndërkombëtar i zhvillimeve ekonomike globale dhe çështjeve me rëndësi ndërkombëtare, si perspektiva e rritjes, stabiliteti financiar dhe reduktimi i varfërisë.
Ministri Malaj zhvilloi një sërë takimesh me drejtues të lartë të FMN dhe BB, si Drejtorin e Departamentit Europian në Fondin Monetar Ndërkombëtar, Alfred Kammer; Shefin e ri të Misionit të FMN-së për Shqipërinë, Diego Cerdeiro; Drejtorin Ekzekutiv për Shqipërinë pranë Bankës Botërore, z.Matteo Bugamelli dhe Zëvendëspresidenten e Bankës Botërore për Europën dhe Azinë Qendrore, znj. Antonella Bassani.
Gjatë këtyre takimeve u diskutua mbi zhvillimet kryesore ekonomike dhe financiare të vendit tonë dhe pritshmëritë për të ardhmen, politikat që qeveria shqiptare po ndërmerr për ruajtjen e stabilitetit ekonomik dhe financiar, si dhe mbi bashkëpunimin mes qeverisë shqiptare dhe dy institucioneve financiare ndërkombëtare. Në mënyrë të veçantë u vu theksi në rëndësinë e vijimit të reformave që mbështesin zhvillimin e qëndrueshëm dhe integrimin europian të vendit.
Në këto takime u theksua se Shqipëria ka ndërtuar një rezistencë të lartë ekonomike përballë krizave të fundit globale dhe kjo është reflektuar në ruajtjen e rritjes ekonomike dhe stabilitetin e sektorit financiar. Politikat e kujdesshme ekonomike dhe menaxhimi i përmirësuar fiskal kanë ndikuar në forcimin e financave publike. Ndërkohë, vendi pritet të vijojë këtë trajektore pozitive, duke siguruar qëndrueshmëri në afatmesëm dhe afatgjatë.
Nga ana e tij, Ministri Malaj bëri një prezantim të treguesve kryesorë makroekonomikë dhe financiarë, duke theksuar se ekonomia shqiptare është rritur me 3.8 % gjatë vitit 2025 dhe parashikohet të rritet me 4 % në vitin 2026, në një kohë që papunësia ka zbritur në nivelin historik prej 8.3% në vitin 2025 dhe pagat mesatare janë rritur me 8.7%. Nga ana tjetër, investimet e huaja direkte kanë vijuar një ecuri pozitive, duke arritur në 1.63 miliardë euro në vitin 2025, me një rritje vjetore prej 3.4%.
Ministri vuri në dukje faktin se përmes vijimit të konsolidimit fiskal dhe menaxhimit të kujdesshëm të financave publike, borxhi publik ka vijuar trajektoren rënëse, duke arritur në 52.9% të PBB-së në fund të vitit 2025, nga 65% në vitin 2019. Ndërkohë, të ardhurat buxhetore shënuan një rritje vjetore prej 6.2%, duke arritur në rreth 754.6 miliardë lekë.
Ministri theksoi se këta tregues konfirmojnë një ekonomi të qëndrueshme, me baza të forta dhe me potencial të qartë për rritje të mëtejshme në afatin e mesëm, në një kohë që janë shënuar edhe përmirësime të vlerësimit të vendit nga institucione ndërkombëtare të vlerësimit të kreditit si Standard and Poor’s dhe Moody’s, duke reflektuar besimin në stabilitetin ekonomik dhe perspektivën pozitive të vendit.
Ministri Malaj vlerësoi partneritetin e qëndrueshëm me FMN dhe Bankën Botërore, si një mbështetje e rëndësishme për avancimin e reformave ekonomike, forcimin e qëndrueshmërisë fiskale dhe zbatimin e projekteve me ndikim të drejtpërdrejtë në zhvillimin e vendit. Ministri shprehu gatishmërinë për të vijuar dhe thelluar këtë bashkëpunim të frytshëm, në funksion të një ekonomie më të fortë, më konkurruese dhe më pranë standardeve të Bashkimit Europian.
Ministri Malaj, së bashku me Guvernatorin Gent Sejko, mori pjesë në takimin me dyer të mbyllura të organizuar nga Departamenti Evropian i FMN-së, me ministrat e financave dhe guvernatorët e bankave qendrore të vendeve të Evropës Qendrore, Lindore dhe Juglindore. Në këtë takim u diskutua mbi perspektivën ekonomike të rajonit, sfidat e politikëbërjes dhe rëndësinë e koordinimit në një kohë me pasiguri të larta globale. Malaj theksoi se Shqipëria vijon të paraqitet me themele më të forta makroekonomike dhe me një angazhim të qartë për stabilitet e qëndrueshmëri.
Një tjetër takim i rëndësishëm i zhvilluar nga Ministri i Financave ishte ai me z.Jacob Helberg, Nënsekretar i Shtetit për Çështjet Ekonomike në Departamentin Amerikan të Shtetit, ku u diskutua mbi zhvillimet aktuale ekonomike, sfidat e reja globale, si dhe mundësitë për forcimin e mëtejshëm të bashkëpunimit mes vendeve tona.
Shqipëria e konsideron SHBA-në një aleat strategjik dhe mbetet plotësisht e angazhuar për të thelluar këtë partneritet të vyer, në funksion të zhvillimit ekonomik, stabilitetit dhe vizionit tonë të përbashkët euroatlantik.
Ministri Malaj mori pjesë dhe në takimin për krijimin e Southeast Europe Technical Assistance Center (SEETAC), një iniciativë që synon forcimin e kapaciteteve institucionale dhe mbështetjen e hartimit e zbatimit të politikave ekonomike e financiare në vendet e Evropës Juglindore. Për Shqipërinë, si pjesë e saj, SEETAC përfaqëson një instrument të rëndësishëm bashkëpunimi teknik, në funksion të avancimit të reformave strukturore, forcimit të qeverisjes ekonomike dhe mbështetjes së procesit të integrimit evropian.
Ministri Malaj vlerësoi bashkëpunimin me Italinë, si vend drejtues i kësaj iniciative dhe veçanërisht Bankën e Italisë, për asistencën në procesin e anëtarësimit, si edhe për hapa të tjerë të rëndësishëm në funksion të modernizimit të kuadrit financiar dhe forcimit të kapaciteteve institucionale të vendit. Shqipëria, tha Malaj, mbetet e angazhuar të kontribuojë në mënyrë aktive dhe konstruktive në këtë platformë të re bashkëpunimi rajonal.
Në kuadër të Mbledhjeve të Pranverës të FMN dhe BB, Ministri i Financave mori pjesë në tryezën e 9-të Ministrore për Ukrainën, ku u rikonfirmua qëndrimi në mbështetje të Ukrainës, sovranitetit, integritetit territorial dhe të drejtës së saj për të zgjedhur të ardhmen europiane.
Gjithshtu, Ministri Malaj mori pjesë në prezantimin e nismës së re botërore “Water Forward”, të organizuar nga Grupi i BB, e projektuar për të forcuar sigurinë ujore dhe për të zgjeruar partneritetet në sektorin e ujit, përmes mobilizimit të investimeve dhe nxitjes së potencialit ekonomik. Në diskutimin e tij, Malaj rikonfirmoi angazhimin e Shqipërisë për garantimin e sigurisë afatgjatë të burimeve ujore, duke theksuar se me objektiva të qarta deri në vitin 2030 dhe në partneritet të ngushtë me institucionet ndërkombëtare, Shqipëria do të vijojë të punojë për ndërtimin e një sektori modern, të qëndrueshëm dhe plotësisht në përputhje me standardet europiane.
Gjatë qëndrimit të tij në Uashington, Ministri Petrit Malaj zhvilloi një takim me përfaqësues të diasporës shqiptare që jetojnë dhe punojnë në Washington DC, profesionistë të angazhuar në institucione financiare ndërkombëtare, si Banka Botërore, FMN dhe IFC. Në këtë takim u diskutua mbi rolin e rëndësishëm të diasporës në zhvillimin ekonomik të Shqipërisë.
Çfarë blen Shqipëria nga gjigantët e eksporteve botërore? Nga makinat dhe pajisjet industriale, te karburantet dhe produktet farmaceutike
Dhjetë ekonomitë që dominojnë eksportet globale janë edhe ndër furnizuesit kryesorë të mallrave që hyjnë në tregun shqiptar. Sipas të dhënave të përpunuara......
Sa është shkalla e punësimit në Shqipëri? Krahasuar me të dhënat e eurostat, renditemi pranë mesatares europiane
Sipas të dhënave të publikuara nga Eurostat, tregu i punës në Bashkimin Evropian ka arritur një rekord të ri në vitin 2025. Plot 76.1% e popullsisë në moshë......
Energjia e erës u rrit me 40% vitin e kaluar - Shtesa rekord prej 165 GW, e udhëhequr nga Kina
Industria globale e energjisë së erës instaloi një rekord prej 165 gigavatësh kapacitet të ri vitin e kaluar, 40% më shumë se në vitin 2024 dhe kryesisht i......
Bota humbi 50 mld dollarë naftë nga lufta - Çfarë do të thotë kjo shifër për ekonominë globale?
Bota ka humbur naftë bruto me vlerë mbi 50 miliardë dollarë që nuk është prodhuar që nga fillimi i luftës me Iranin gati 50 ditë më parë dhe pasojat e krizës......
Kosova, rritje e madhe e investimeve të huaja në 2025 - U shtuan me 30% duke arritur në 1,03 miliardë euro
Kosova po shënon një moment të rëndësishëm në zhvillimin ekonomik, duke u pozicionuar si lider në rajonin e Ballkanit për rritjen e Investimeve të Huaja......
Si ka nisur kjo javë për valutat kryesore?
Dollari amerikan e ka nisur javën pozitivisht duke regjistruar rritje të lehtë të kuotës në raport me një javë më parë teksa është blerë mëngjesin e sotëm me......
8 milionë shtëpi në Itali, të pabanuara - Analiza, 86% e pronarëve përmendin mospagesën e qirasë shqetësim kryesor
Në Itali, kriza e strehimit nuk shkaktohet nga mungesa e banesave, por nga një furnizim që po përpiqet të bëhet i disponueshëm. Në këtë përfundim ka arritur......
Ish-presidenti pro rus fiton zgjedhjet në Bullgari - Partia e Rumen Radev merr mbi 44% të votave
Ish-presidenti pro rus Rumen Radev ka fituar thellë në zgjedhjet parlamentare të Bullgarisë, treguan rezultatet zyrtare, duke i dhënë fund potencialisht......
