“Sot, në kohë zhvillimi, ju duam partnerë” - Ministri Hoxha: Vizioni i përbashkët të kthehet në bashkëveprim
Fjala e plotë e Ministrit për Evropën dhe Punët e Jashtme, Ferit Hoxha, në Samitin e Diasporës
Sot nuk mblidhemi thjesht për një takim të radhës.
Si çdo herë kur bëhemi bashkë, përfaqësues të një kombi të shtrirë në rajon dhe një shoqërie që jeton në shumë vende, sot në këtë sallë të madhe e të mbushur plot rreh një zemër e madhe.
Një zemër që e bën këtë qytet – sot e përditë – më shumë se kryeqytetin e Shqiprisë: e bën një shtëpi të përbashkët për të gjithë ne.
Samiti i IV-të i Diasporës vjen në një moment kyç, siç e theksoi dhe Presidenti dje.
Ndërsa bota përreth nesh po ndryshon në mënyrë marramendëse, Shqipëria po ecën më shpejt se kurrë drejt të ardhmes evropiane që i ka projektuar vetes. Këtë mund të them me bindje dhe për Kosovën.
Dhe shqiptaria, kudo që ndodhet, është sot më e fortë dhe më e gjallë se kurrë.
Ky realitet na kujton një të vërtetë thelbësore: diaspora nuk është thjesht “jashtë”.
Ajo është pjesë e pandashme e qenies sonë.
Jo një adresë ku drejtohemi kur kemi nevojë, por një dimension plotësues i identitetit tonë kombëtar.
Për shumë vite, marrëdhënia jonë me diasporën është parë si një rrugë me një drejtim. Sot e dimë: është një rrugë me dy kahje.
Historia jonë e përbashkët na ka mësuar se largësia nuk e dobëson lidhjen. Përkundrazi, e forcon atë.
Por kjo lidhje kërkon kujdes, kërkon vëmendje dhe, mbi të gjitha, kërkon dëgjim.
Kemi shumë për të thënë për kulturën, identitetin, inovacionin, turizmin, zhvillimin lokal, talentet dhe të rinjtë, për shërbimet në linjë, përfshirë shërbimin tonë konsullor. Nuk do të ndalem këtu sepse për të gjitha këto e shumë të tjera do të diskutojmë ne detaje gjatë këtyre ditëve.
Por në këto minuta hyrëse, më lejoni të them dy fjalë mbi një aspekt të veçantë e themelor: gjuha shqipe.
Sepse ajo është ADN-ja jonë.
Ajo nuk është thjesht mjet komunikimi — është kujtesë, identitet, është vazhdimësi.
Pa gjuhën, do të na mbetej vetëm trupi; dhe një trup pa shpirt varfërohet e tkurret.
Prandaj, përpjekjet për gjuhën – në Shqipëri, në rajon dhe në diasporë – janë përpjekje për të qenë vetvetja.
Gabimi më i madh do të ishte të ngatërronim të përkohshmen me të përhershmen.
Të sakrifikonim thelbin me lehtësinë e momentit.
Nëse gjuha jonë, e cila u ka rezistuar shekujve në kohë shumë më të vështira, dobësohet sot – kur jemi më të ditur, më të fortë dhe më të lidhur se kurrë – atëherë përgjegjësia është vetëm e jona.
Ky është mesazhi i kërkesës legjitime të studentëve në Maqedoninë e Veriut për të ushtruar të drejtat e tyre në gjuhën amtare.
Këtë duhet ta kemi parasysh edhe për mësuesit, vullnetarët dhe organizatorët në diasporë, që mbajnë gjallë gjuhën tonë çdo fundjavë, në çdo klasë, në çdo aktivitet.
Ata meritojnë jo vetëm mirënjohje; meritojnë më shumë mbështetje konkrete dhe për këtë jemi të angazhuar me gjithë ekipin në Ministrinë e Jashtme.
Forca jonë ka qenë gjithmonë të jemi të hapur, të mësojmë gjuhë të tjera por pa harruar tonën.
Të hapemi ndaj botës, pa humbur veten.
Të ndërtojmë ura me të tjerët, pa shembur themelet tona.
Dhe ne kemi marrë angazhimin që gjuhën shqipe, pjesë e familjes së madhe indo-evropiane, ta çojnë në vendin që meriton, në familjen e madhe evropiane.
Të dashur bashkëatdhetarë,
Historia e diasporës është histori sakrifice, qëndrese dhe përkushtimi. Por çdo ditë e më shumë, ajo është edhe histori suksesi.
Nga brezi i parë që u largua me pak shpresë por me shumë kurajë, tek profesionistët e sotëm që udhëheqin në shkencë, teknologji, biznes e kulturë — ju keni ndërtuar një kapitull të ri të shqiptarisë globale.
Suksesi juaj nuk është vetëm personal — është edhe kombëtar. Sepse çdo arritje e juaja është një dritare më shumë për Shqipërinë në botë.
Shqipëria që transformohet dhe diaspora që afirmohet janë dy anë të së njëjtës medalje.
Dhe kjo medalje ka një emër: shqiptaria në zhvillim dhe forcim.
Edhe nga larg, ju keni qenë gjithmonë afër.
Në kohë të vështira, keni qenë mbështetje.
Sot, në kohë zhvillimi, ju duam partnerë.
Ky samit nuk është një ceremoni.
Është një hapësirë pune. Një laborator idesh.
Një pikë takimi në mënyrë që vizioni i përbashkët të kthehet në bashkëveprim.
Përgjatë këtyre ditëve, do të diskutojmë për sfida dhe mundësi konkrete: për mundësi e oportunitete, projekte e aktivitete, për shkëmbim dijesh dhe për ruajtjen e identitetit.
Do të dëgjojmë edhe kritikat, por edhe propozimë e rekomandime.
Nuk do të kemi monolog - sepse duam dialog.
Nuk do të flasim për ju – sepse duam te flasim me ju.
Nuk do të jeni dëgjues apo spektatorë — sepse ju duam aktorë;
Jo me ndjenjën e fajit por me peshën e përgjegjësisë dhe energjinë e mundësisë;
Pikërisht për këtë kemi ndërtuar plot 19 panele bashkëbisedimi, si asnjëherë më parë, me tematika shumë të larmishme, si dhe plot aktivitete anësore specifike që prekin drejtpërdrejt jetën tuaj dhe ndikojnë në të ardhmen tonë të përbashkët.
Sepse kemi shumë për të thënë e për të ndarë, por dhe më shumë për të bërë.
Qëllimi ynë është i thjeshtë dhe ambicioz njëkohësisht: të mësojmë nga njëri-tjetri, të ndërtojmë ura më të forta dhe të krijojmë mekanizma konkretë që e bëjnë këtë lidhje të qëndrueshme, funksionale, efektive.
Sepse Atdheu është kudo ku ka shqiptarë.
Sepse, siç e kemi thënë, përmes rrënjëve lartësohemi dhe përmes dijes forcohemi.
Faleminderit të gjithëve që jeni këtu — si pjesëmarrës, moderatorë, panelistë, kontribues dhe bashkëudhëtarë në këtë rrugëtim.
Një gjë është e qartë: e ardhmja e sigurtë dhe e begatë ndërtohet më mirë dhe më shpejt së bashku.
Tregu i sigurimeve konsolidon pozicionin financiar - Sipas AMF, “Jo-Jeta” mbetet kontribuesi kryesor në rezultat
Gjatë vitit 2025, tregu i sigurimeve ka konsoliduar më tej pozicionin e tij financiar, duke reflektuar një përmirësim të ndjeshëm të performancës krahasuar......
Rënie drastike për Dollarin amerikan – Forcohen Franga dhe Paundi
Dollari amerikan ka regjistruar një rënie drastike të vlerës këtë mëngjes në raport me ditën që lamë pas duke humbur gati 1 pikë teksa është blerë sot me......
BE, më shumë subvencione për karburantin - Synohet përballimi i rritjes së çmimeve të luftës
Komisioni Evropian dëshiron t'u lejojë vendeve të lëshojnë më shumë para publike për të ndihmuar bizneset me faturat e karburantit dhe plehrave kimike,......
Paralajmërohet mungesa e karburantit për avionët - Kërkohet ndërhyrja e Komisionit Europian për zgjidhjen e situatës
Evropa mund të përballet me mungesë karburanti për avionë brenda disa javësh, paralajmëron organi i aeroporteve Grupi i industrisë së aeroporteve në Evropë......
BE dyfishon tarifat doganore për çelikun e importuar - Synohet mbrojtja e industrisë nga konkurrenca e fortë e Kinës
Bashkimi Evropian po i forcon ndjeshëm masat e mbrojtjes së çelikut, pasi eurodeputetët dhe shtetet anëtare kanë vendosur të dyfishojnë tarifat doganore për......
Shitje rekord e makinave elektrike në mars - Tendenca globale pas rritjes së çmimit të karburantit
Çmimet e larta të karburantit në Evropë i orientuan blerësit e makinave drejt automjeteve elektrike në një mars rekord dhe çuan në muajin e parë të rritjes......
Samiti i Diasporës, Presidenti Bajram Begaj: Ju jeni fuqia dhe forca jonë!
Presidenti i Republikës, Sh. T. Z. Bajram Begaj, përshëndeti sot çeljen e Samitit IV të Diasporës Shqiptare. Gjatë kësaj fjale, Presidenti Begaj theksoi......
“Çmimet të pasqyrojnë cilësinë e shërbimit”, Rama bashkëbisedim me operatorët turistikë në Vlorë
Çmimet në bregdet duhet tëpaqsyrojnë cilësinë e shëimit, është kjo këshilla që kryeministri Rama iu dha operatoëve turistikë të Vlorësn ë një takim të......
