Udhëtime falas në të gjithë vendin - Ky shtet europian ka ulur me 100% çmimet e transportit hekurudhor!

Çmimet e transportit publik në shërbimin shtetëror në të gjithë Spanjën tashmë janë ulur përgjysmë në përgjigje të rritjes së shpejtë të normave të energjisë dhe inflacionit. Tani qeveria ka shpallur zbritje të tjera 100%.

Që nga shtatori, pasagjerët do të mund të udhëtojnë nëpër trena të ndryshëm të operuar nga rrjeti publik i trenave Renfe për absolutisht asgjë.

Kryeministri i Spanjës Pedro Sanchez ka njoftuar se biletat e shumë-udhëtimeve për trenat e operuar nga shërbimet publike të rrjetit Cercanías, Rodalies dhe Media Distance (ekuivalente me udhëtimet lokale dhe të distancave të mesme) do të jenë pa pagesë nga 1 shtatori deri në fund të këtij viti.

Sipas transmetuesit publik TVE, masa përjashton biletat e një udhëtimi ose udhëtimet në distanca të gjata. Biletat me shumë udhëtime përfshijnë të paktën 10 udhëtime vajtje-ardhje.

Skema Renfe u njoftua menjëherë pasi qeveria spanjolle u angazhua për një ulje prej 50% të tarifave të transportit publik për transportin shtetëror.

Spanja nuk është i vetmi vend europian që ka marrë masa për të ulur kostot e transportit publik.

Muajin e kaluar, Gjermania lançoi një biletë mujore të pakufizuar të transportit publik prej 9 € (9,50 dollarë) që mund të përdoret në transportin lokal dhe rajonal në të gjithë vendin. Marrëveshja, pjesë e një pakete të ndihmës energjetike të qeverisë, është planifikuar të zgjasë deri në fund të gushtit.

Në fund të vitit 2021, Austria prezantoi një "biletë klimatike" me zbritje të madhe të vlefshme në të gjitha mënyrat e transportit publik në vend, me qëllimin për të inkurajuar njerëzit që të lënë makinat e tyre në shtëpi. Klimaticket kushton vetëm 1,267 dollarë (1,095 euro) në vit, që shkon në rreth 3,50 dollarë në ditë.

Edel Strazimiri / SCAN