Shqipëria Postuar më 8 Gusht 2025, 11:23

Normat e interesit për depozitat në 2025 - BSH: Me prirje rënëse. Ato mbi 2 vite për individët, të vetmet me rritje në maj

Nga Ledina Elezi

Normat e interesit për depozitat në 2025 - BSH: Me prirje

Në 2025, normat e interesit të depozitave në lek kanë qenë në rënie të vazhdueshme për qytetarët. Të dhënat më të fundit nga Banka e Shqipërisë tregojnë se në maj të këtij viti, normat e interesit ishin mesatarisht 1.57% për depozitat e reja të individëve nga 2.09% që u regjistruan një vit më parë.

Pavarësisht se normat e interesit nuk kanë qenë shumë të favorshme dhe fitimi nga depozitat është më i vogël se më parë, kursimet e shqiptarëve në bankë kanë qenë sërish në rritje.

Kyçja e shumave të mëdha të parave për një periudhë më të gjatë kohore ka bërë që normat për depozitat mbi 2 vite të rriten në 2.56% në muajin maj nga 2.26% që ishin në prill. Normat e interesit për depozitat nga një deri në dy vite ranë në 2.03%, ndërsa ato deri në 1 vit mbetën thuajse të pandryshuara.

Normat e interesit për depozitat e qytetarëve kanë qenë më të ulëta se ato të bizneseve, për arsye se këta të fundit depozitojnë shuma më të larta në bankë se qytetarët. Sipas statistikave zyrtare, normat e interesit për depozitat e bizneseve nuk kanë ndjekur një prirje rënëse si depozitat e individëve, por kanë pasur ulje-ngritje të herëpashershme.

Megjithatë, në muajin maj, edhe normat e interesit për depozitat e bizneseve rezultuan me rënie. Normat ishin mesatarisht 2.34% për depozitat e reja të bizneseve nga 2.79% që u regjistruan në maj 2024. Megjithatë, në ndryshim nga individët, normat për kursimet afatgjata mbi 2 vite zbritën në 3.12%, ato nga një deri në dy vite nuk ndryshuan, ndërsa normat e interesit për depozitat deri në një vit ranë gjithashtu në 2.34%.

Nga ana tjetër, normat e interesit për depozitat në euro mbeten më të ulëta se ato në lek, por me rritje në krahasim me muajt e tjerë. Normat e interesit arritën në mesatarisht 1.16% për kursimet e individëve dhe 1.38% për ato të bizneseve.

 

Shqipëria 8 Gusht Edel Strazimiri

Si është mbyllur kjo javë për valutat kryesore?

Dollari amerikan e ka mbyllur javën negativisht duke vijuar përgjatë këtyre ditëve një rënie të vazhdueshme teksa është blerë këtë mëngjes me 82.4 lekë dhe......

Live TV

Të fundit
Të gjitha lajmet

Më të vizituarat