Çmimet e gazit, në nivelet më të larta të 2 viteve - Shtohet pasiguria e furnizimit në tregjet evropiane

Çmimet evropiane të gazit natyror u rritën në nivelin më të lartë të dy viteve, ndërsa temperaturat më të ftohta zbrazin objektet e magazinimit të rajonit. Kontratat e së ardhmes u rritën me 5.4%, në 58.75 € për megavat-orë. Ky është niveli më i lartë që nga shkurti i vitit 2023.

Evropa Veriperëndimore po përgatitet për temperature të ulëta në ditët në vijim, të cilat mund të rrisin kërkesën për ngrohje dhe t'i japin shtysë rritjes që ka dominuar vitin deri tani. Konsumi më i lartë i karburantit rrezikon të boshatisë më tej rezervat, të cilat tashmë janë në nivelin më të ulët për këtë periudhë të vitit që nga kriza e energjisë në 2022.

Kushtet e ftohta dhe me pak erë në të gjithë Evropën kanë rritur konsumin e gazit këtë dimër dhe kanë reduktuar prodhimin e burimeve të rinovueshme. Inventarët janë plot vetëm 49% krahasuar me 67% në të njëjtën kohë vitin e kaluar, duke e bërë më të vështirë rimbushjen e tyre gjatë muajve të ngrohtë. “Rreziku i hyrjes së Bashkimit Evropian në pranverë me inventarë shumë të ulët të gazit është rritur në dy javët e fundit. Jo vetëm që muaji i parë është rritur, por pritet gjithashtu një rritje e çmimeve kalendarike 2026-2027," theksojnë analistët.

Ndërkohë, tregtarët kanë vendosur të mblidhen në Gjermani këtë javë për të diskutuar zhvillimet e tregut. Përveç motit, ata po vëzhgojnë me vëmendje ndikimin e tarifave amerikane dhe hakmarrjet e mundshme, të cilat rrezikojnë t'i bëjnë më të shtrenjta importet e gazit të lëngshëm natyror.

Konsumi i gazit në Evropë pritet të rritet me 17% këtë muaj nga një vit më parë, i nxitur nga kërkesa komerciale dhe për banesat. Parashikohet që inventarët do të jenë 37% të mbushur deri në fund të dimrit. Tregtarët po nxitojnë gjithashtu të mbrohen kundër rritjes së çmimeve evropiane të gazit, duke sinjalizuar se ata presin ndërprerje të mëtejshme të furnizimeve.